Jólin hér, jólin þar, jólin þau eru alls staðar...................

Já það er allt jóla jóla núna. Ég fór til dæmis í klippingu áðan og það var jólaklippingin:) reyndar fékk ég jólaeyrnaþvottinn í leiðinni......stelpan sem þvoði á mér hárið ákvað að ég þyrfti greinilega að þvo betur á mér eyrun því hún sprautaði vel og rækilega inn í eyrun á mér meðan hún var að þvo mér um hárið. Yfirleitt reyna þær að passa sig að það fari ekki margir lítrar af vatni inn um eyrun en þessari leist greinilega ekki á blikuna og smúlaði allt vel og rækilega. Þannig að maður fer nú bara að verða tilbúinn fyrir jólin, er allavegana nýklippt og með alveg tandurhrein eyru, hehe:)

Ég fór í leikhús á sunnudaginn með börn systur minnar á leikritið "Leitin að jólunum" og skemmtum við okkur alveg konunglega. En sum börnin sem voru þarna voru alveg skíthrædd þegar jólakötturinn birtist og síðan ætlaði allt um koll að keyra þegar Frú Grýla mætti á svæðið. Leikritið var ekki í venjulegum leiksal heldur eltum við leikarana um allt Þjóðleikhúsið þannig að börnin voru mikill partur af leikritinu og sátu mjög nálægt leikurunum. Mér fannst þetta mjög skemmtileg útfærsla á leikriti því það getur verið svo skemmtilegt að sjá hversu mikið krakkar lifa sig inn í leikritið sem þau eru að horfa á. Á tímabili í leikritinu "týndist" annar aðalleikarinn og ein stelpan sem var áhorfandi vildi mikið hjálpa til við að finna hann. Svo loks þegar hann "fannst" aftur þá hljóp hún til hans og faðmaði hann og sagði: "við erum búin að leita að þér út um allt" og sagði honum hvað hún væri fegin að hann væri fundinn. Auðvitað sprungu allir fullorðnu áhorfendurnir úr hlátri og aumingja leikarinn vissi ekki hvaðan af sér stóð veðrið en náði að halda andliti og spinna út frá þessu og halda svo áfram með leikritið. Eins og ég sagði mjög góð skemmtun;)

Við skötuhjúin ætluðum að taka jólagjafainnkaupin með trompi þetta árið og byrja snemma. Fórum sem sagt í búðir í gær í þeim tilgangi að kaupa gjafir, það er að segja þær sem við vorum búin að ákveða. En þar sem að gert er ráð fyrir að allir Íslendingar séu á síðasta snúningi með jólagjafainnkaupin þá er ekki allt komið í búðirnar sem þær eru þó búnar að auglýsa í jólagjafabæklingunum sem hafa flætt inn um dyralúguna undanfarna daga. Þannig að okkur tókst ekki að klára jafn mikið og áætlanir stóðu til en við erum þó byrjuð, sem er nú hálfgert met á okkar heimili;)

Þegar við vorum á leiðinni heim og ég að hneykslast á þessum seinagangi búðanna þá benti Óli mér nú á að það væru nú aðeins liðnir nokkrar dagar af desember þannig að þetta væri nú kannski allt í lagi. Ég er bara svo vön að hafa einungis nokkra daga fyrir allt jólastússið því þetta eru fyrstu jólin sem ég er ekki í prófum og ég kann bara ekki á þetta að hafa svona marga daga til að geta verslað:) Held að þetta prófleysi sé líka ástæðan fyrir því að mér finnst ekkert eins og það séu alveg að fara að koma jól.

En það var nú fleirum en okkur sem datt í hug að fara í gær í verslunarleiðangur því það var þvílíkt mikið af fólki þarna í Kringlunni og mér fannst þetta bara vera eins og nokkrum dögum fyrir jól. Nema hvað maður fann að fólk var afslappaðra en það er síðustu dagana fyrir jól.

Best að reyna að demba sér í lærdóm og athuga hvort maður finni ekki jólastemminguna í bókunum:)

Við Óli fórum á Bond í gær og ég verð nú bara að segja að ég var mjög ánægð með þennan nýja Bond, var eins og svo margir aðrið með efasemdir um hann. En mér fannst myndin greinilega svo góð að ég var bara komin í Bond myndina í draumum mínum í nótt, allavegana var ég stödd í álíka hættulegum aðstæðum og Bondinn kemur sér oft í og auðvitað bjargaðist ég úr klóm vondu mannanna;)

En það er kominn 1.des og ég er mjög ánægð með að ég hef ekki heyrt eitt einasta jólalag í útvarpinu fyrr en í morgun þegar ég var að keyra í skólann. Ég er ein af þeim sem vill ekki byrja með allt þetta jóla jóla fyrr en einmitt í dag 1.des. Já ég get verið soldið skrítin. En annars fyrst það eru komin mánaðarmót þá skil ég ekkert í því hvað varð um nóvember, hann var búinn áður en hann byrjaði - get svo svarið það. Einhvern veginn hef ég það nú á tilfinningunni að desember eigi ekki eftir að líða neitt hægar sérstaklega þegar jólastressið blandast saman við verkefnastressið þá held ég að tíminn eigi eftir að fljúga. En þá er kannski best að fara að gera eitthvað af viti og hætta að leika sér á netinu.

Góða helgi og njótið fyrsta í aðventu á sunnudaginn:)